Опубликовано: 26 January 2018

Шахматъя турнир ортчиз Калыкъёслэн Эшъяськон юртазы

20-тӥ толшоре Калыкъёслэн Эшъяськон юртазы шахматэн шудонъя турнир радъяськиз. Кӧня ке ар ӵоже ини со ортче йӧскалык политикая азьвыл министрез В.Н. Завалинэз буре вайыса. Турнир ортчытӥське армянъёслэн «Урарту» мерлыко огазеяськонзылэн кичӧлтэмез улсын. Валтӥсь мугъёсыз луо: пӧртэмы выжыысь калыкъёслы куспазы кенешон-вераськон площадка кылдытон, тупаса улонэз вӧлмытон, мерлыко огазеяськонъёслэсь эшъяськон кусыпъёссэс юнматон, шахматэн усто шудӥсьёсты шараян.

Шудӥсьёслы пумитан но сӥзён кылъёсын вазиськизы Удмурт Элькунысь йӧскалык политикая министрлэн нырысетӥ воштӥсез П.А. Орлов, «Урарту» мерлыко огазеяськонлэн кивалтӥсез М.М. Аракелян, «Батьковщина» белорусъёслэн мерлыко огазеяськонзылэн кивалтӥсьсы Н. Д. Украинец. Азьветлӥсьёс шудӥсьёслы тунсыко шудон но вормон сӥзизы, шуныт кылъёсын буре вайизы йӧскалык политикая азьвыл министрез В.Н. Завалинэз. «Арлы быдэ та турнирез ортчытыку, асьмеос шуныт кылъёсын буре вайиськомы удмурт калыклэсь дано пизэ, йӧскалык политикая азьвыл министрез Владимир Завалинэз. Калыкъёслэн Эшъяськон юртсы асьмелы луонлык сётэ ӵошен люкаськыны но дано адямиосты тодэ вайыны, соослэсь йӧслыксэс но инмарзэс лыдэ басьтытэк. Ӟечлык понна асьмеос котьку ӵошен мыныны кулэ, соку асьмеос котьку вормомы уродзэ», – пусйиз Мнацакан Аракелян.

Туэ турнире пыриськиз 28 команда. Таӵеез ӧй на вал. Соос пӧлысь 10 команда нылпиослэн. Мерлыко огазеяськонъёслэн 17 командазы шудӥз. Тужгес трос команда люказы (быдэн 3 команда) бигер егитъёслэн «Иман», армянъёслэн «Урарту» но еврейёслэн мерлыко огазеяськонъёссы. Пусйытэк кельтыны уг луы шудӥсьёслэсь арлыдзэс но. Тужгес но егитэз шудӥсь туэ нырысетӥ классэ гинэ мыноз ай, нош самой арлыдоезлы 82 арес тырмем ини. Мнацакан Аракелянлэн верамезъя, пиналъёслэн турнире пыриськемзы туж шумпотымон. Соин ик огазеяськон матысь дыре нылпиос понна нимысьтыз турнир радъяны малпа.

Шудӥсьёслэн пӧртэм арлыдо луэменызы, вормисьёсты кык категориын бырйизы: 16 аресозь егитъёс пӧлын но арлыдоос пӧлын.

Егитъёс пӧлысь пьедесталэ тубизы «Удмурт Кенеш» (3-тӥ инты), Удмуртиысь бигеръёслэн интывыл автономизы (2-тӥ инты), Удмуртиысь белорусъёслэн «Батьковщина» (1-тӥ инты) мерлыко огазеяськонъёс понна шудӥсьёс. Нош арлыдоос пӧлын 3-тӥ инты басьтӥзы Удмуртиысь бигеръёслэн интывыл автономизы, кыкетӥ интые потӥзы Удмуртиысь белорусъёслэн «Батьковщина» огазеяськонзы, вормиз бигер егитъёслэн «Иман» огазеяськонзы.

Вормем командаосты, озьы ик нимаз вормисьёсты, медальёсын, кубокъёсын, дипломъёсын но дуно кузьымъёсын пусйизы.



Информационно-аналитическоe управление Администрации города Ижевска © 1998-2017г.

При любом использовании материалов сайта ссылка на www.izh.ru обязательна
вход авторов,