М. Горький нимо Гужем сад


Гужем сад (нырысетӥ нимыз Генерал сад) – Ижкарысь тужгес но пересез парк. Со тужгес но утялтэмъёсыз-умоятэмъёсыз пӧлы пыре, татчы тужгес но трос адямиос ветло, малы ке шуоно парк карлэн шораз интыяськемын, нош транспорт сое Ижкарлэн котькуд сэрегеныз герӟа.

Скверез пӧрмытӥсь нырысьёсыз писпуос XIX дауре Береговая (али – Милиционная) но Базарная (али – М. Горький нимо урам) ульчаос лэсьтӥськемъя кылдӥзы. Куке Генерал корка ӝутӥськиз но 1857–1858-тӥ аръёсы юрт котырысь интыез чеберманъя ужъёс нуиськизы – выль писпуос мерттӥзы, аллея кылдытӥзы, сяська убоос тупатӥзы, беседкаос лэсьтӥзы – соку сквер «садлы» пӧрмиз.

Вань мылкыд карисьёс понна Генераллэн садэз 1917-тӥ арын инвожое гинэ усьтӥськиз, со арын ик нырысетӥез калык юмшан ортчиз. Ӝытъёсы татын духовой оркестр шудӥз, со сяна, ас кужымен дасям пичиесь концертъёс ортчытъяськизы.

1920-тӥ аре гужем садын лэсьтэмын вал бадӟым Гужем театр – Ижкарысь нырысетӥез театр юртъер. Татын ик арня вискын кинофильмъёс возьматӥськизы.

1923-тӥ аре 1–8-тӥ инвожое та садын Удмурт автономной республикалэн гурт возёсъя нырысетӥ адӟытонэз ортчиз. Куд-огез экспонатъёс Москвае, Гурт возёсъя Россиякуспо нырысетӥ адӟытонэ келямын вал.

1928-тӥ аре 30-тӥ куартолэзе Гужем садын но солэн театраз «Горькийлэн нуналъёсыз» кутскизы: соос сӥземын вал быдӟым ӟуч писательлэн Максим Горькийлэн вордскемез дырысен 60 ар тырмонлы. Ӵапак татын Горькийлэн «На дне» пьесаезъя пуктэм сюрсэтӥез спектакль возьматэмын вал. 1928-тӥ арын 23-тӥ инвожое театрлэн кивалтӥсьёсыз Москваысь бандероль басьтӥзы, отын писательлэн туспуктэмез но тазьы гожтэмез вал: «Ижкарын улӥсьёслы саламен, сэзь мылкыд сӥзьыса. Муско. Максим Горький, 16.VI.28 ар». Со аре ик Ижысь кар Кенешлэн пуктэмезъя Гужем театр Максим Горькийлэсь нимзэ басьтӥз. 1936-тӥ арын, писатель кулэм бере, Гужем театрлы но солэсь нимзэ сёто.

1935–1958-тӥ аръёсы, Ижкар бадӟымамен но отын улӥсьёслэн лыдзы будэмен валче, садлэн но интыез пумен паськытаз. Отчы пыриз тымет палась гурезё инты но азьвыл Ижкар базарлэн куштэм интыез. Озьы ик, садэз бадӟыматон вылысь, кӧня ке купеч коркаосты но М. Горький нимо пулэсь лэсьтэм гужем театрез сэрттӥзы. Соин валче туала аттракционъёсты пуктыны луонлык кылдӥз. Со сяна, ульча паласен, быдэс сад кузя, кортлэсь лэсьтэм юн кенер кыскизы, садэ пыронни но умоятэмын вал.

Кылем даурысь 30-тӥ аръёсы парке А.М. Горькийлэсь скульптуразэ пуктӥзы: сое али но Гужем садлэн Шор аллеяысьтыз адӟыны луэ.

Страна:
Россия
Город:
Ижкар
Адрес:
Милиционная урам, 4
09.07.2013
Информационно-аналитическоe управление Администрации города Ижевска © 1998-2017г.

При любом использовании материалов сайта ссылка на www.izh.ru обязательна
вход авторов,