Кун мунё театр


Мунё кун театрлэн туала юртэз лэсьтэмын 1980-тӥ аре, но театрлэн кылдон сюресэз кутскиз трослы вазьгес – 1935-тӥ аре. Сое кылдытон бордын тыршизы С. Ломовская но М. Точилина (Стрелкова): соос йылпумъязы мунёен ужаны дышетӥсь курсъёсты, кудъёсыз радъямын вал С. Образцовлэн кивалтэмез улсын ужась Шор мунё театрын.

Рольёсты нырысь-валысь шудӥзы кружоке ветлӥсь мылкыдчиос. Нырысетӥез спектакль, «Возьыттэм лушкаськись адямилы пӧрмиз», пуктэмын вал 1935-тӥ арын 25-тӥ оштолэзе Е. Сперанскийлэн пьесаезъя, режиссеръёсыз – С. Ломовская но М. Точилина.

Быдӟым ожгар дыръя вань театръёс пӧлысь мунё театр гинэ ӧз пытсаськылы.

Театр – Удмуртиысь комсомоллэн премиезлэн лауреатэз, Удмурт Элькунлэн Кун премиезлэн лауреатэз, нылпиосын быгатыса ужамез понна пусъемын Россиысь Минкультуралэн Данъян грамотаосыныз. Пусъемын Венгриысь но Чехословакиысь Минкультураослэн выли дунъетъёсынызы. Мунё театр котьку пыриське нылпи театръёслэн Калыккуспо фестивальёсазы. Театрлэн репертуараз, пичиослы сяна, бадӟымъёслы чаклам возьматонъёс но вань: Г. Горинлэн «Шут Балакирев» пьесаезъя комедия, Ф. Смольяниновлэн «Поэт или Разговор с собственным чертом» но Н. Гогольлэн «Записки сумасшедшего» ужъёссы.

Мунё театр трос лэсьтэ нылпиослы чеберлык сярысь валан пыӵатон понна. Озьы ик театр уг вунэты бадӟымъёссэ учкисьёссэ но. Туннэ понна театрлэн репертуараз – 24 спектакль пичиослы, 4 спектакль – бадӟым классъёсын дышетскисьёслы но арлыдоослы; соос пуктэмын ӟуч но кунгож авторъёслэн пьесаоссыя.

Театрын шудӥсьёс тросэз кык кылын верасько бере, кӧня ке спектакльёс удмурт авторъёслэн ужъёссыя но пуктэмын.

2009-тӥ арын толшоре, юртэз рос-прос тупатъянъя ужъёс ортчем бере, Удмурт Элькунысь Кун мунё театр ӧсъёссэ выльысь учкисьёслы усьтӥз. Выльдэм бере солэн тусыз трослы воштӥськиз. Табере сое чеберматэ башня, кудӥзлэн йылаз инъямын флюгер луись павлин. Залэ пуктылэмын юри пичиослы чаклам выль пуконъёс-креслоос. Заллэн пыдлояз нимысьтыз бадӟым ложа кылдӥз. Театрлэн ужан цехъёсаз выль оборудование ваемын. Выль сямен адӟисько фойе но буфет. Юртлэн планировкаезлэн бадӟым воштӥськонэз герӟаськемын соин но: ӧлексы луись учкисьёслы юри пырон дасямын, озьы ик юрт пушкын но соослы нимысьтыз инты висъямын.

Страна:
Россия
Город:
Ижкар
Адрес:
ул. Ломоносова, 9
09.07.2013
Информационно-аналитическоe управление Администрации города Ижевска © 1998-2017г.

При любом использовании материалов сайта ссылка на www.izh.ru обязательна
вход авторов,