Удмурт Элькунысь Кун цирк


Ижкарысь нырысетӥез цирк 1895-тӥ аре пызь вузан базар вӧзын Базарной нимо падвожын усьтэмын вал (Горький но Бородина нимо урамъёс вожын, Механической институтлэн вуж юртъерез интыын). Цирклэн пу юртэз А. Г. Коромыслов ужбергатӥсьлэн коньдонэныз пуктэмын вылэм. Цирке Венаысь, Парижысь, Берлинысь артистъёс вуылӥллям, нюръяськисьёслэн чемпионатъёссы ортчылэм. Цирк ӝуам Граждан ож вакытэ.

1926-тӥ аре гужем Сенной базар вӧзысь падвожын цирклэн 1500 адямилы чаклам ялан ужась выль юртэз усьтӥське. Нырысь-валысь со пулэсь лэсьтэмын вылэм, гурен эстӥськем но карасин лампаосын югдытӥськем. Циркез «Коларт» шуыса нималлям.

1939-тӥ арозь цирклэн юртэз туж вужмем, соин сэрен интыяз выль из юрт пуктыны кылкутэмын вал. П. М. Попов архитектор ӵектосэзлы интъет кариз Петербургысь Чинизеллилэсь Россиын нырысетӥзэ излэсь пуктэм цирксэ, кудаз акробаткалэн но пӧйшуръёсты зӥбломытӥсьлэн барельефъёсынызы портик ватсаз. П. М. Попов цирклэсь куползэ но 20 метрлы вылэгес ӝутӥз на. Аслаз быдӟалаеныз, ӟечлыкеныз но аспӧртэмлыко луэменыз та юрт кема аръёс ӵоже быдэс кунамы тужгес умоен лыдъяськиз. Цирклэн выль юртэз 1943-тӥ аре 29-тӥ шуркынмонэ усьтӥськиз. Нырысетӥ учкисьёсыз Ижкарысь госпиталъёсын эмъяськись ожчиос вал.

1990-тӥ аре юртэз кышкытлыко шуыса ялӥзы но, 14-тӥ толшоре циркын берпуметӥ концерт сётэмын вал. Шудӥсьёс йыбырттыны потэм бере, оркестр Славянка маршез шудӥз. 29-тӥ толсуре ӵукна омырез пуштытэм куара зуркатӥз: озьы вуж цирклэсь борддоръёссэ куашкатӥзы. 2000-тӥ аре 17-тӥ толшоре та интые пуктэмын вал выль, аспӧртэмлыко цирк огъетлэн нырысетӥ блокез.

Туала цирклэн юртэз хай-тек амалэн лэсьтэмын. Аспӧртэмлыко вылтусыныз сяна, со вылӥ ӟечлыко аппаратураеныз, цирковой оборудованиеныз но 1750 адямиез тэрытӥсь залэныз висъяське. Ижкарысь цирк выллем огъет быдэс Россиын мукетыз ӧвӧл ни.

Страна:
Россия
Город:
Ижкар
Адрес:
ул. Красноармейская, 136
09.07.2013
Информационно-аналитическоe управление Администрации города Ижевска © 1998-2017г.

При любом использовании материалов сайта ссылка на www.izh.ru обязательна
вход авторов,