З.О. Лятушевичлэн коркаез


Пичигес одӥг этажъем мезонинэн из особнякез С.Е. Дудин архитектор пуктӥз Захарий Осиевич Лятушевич протоиерей понна.

Захарий Осиевич Лятушевич – протоиерей, калыкез югдытӥсь, кылбурчи. Вордскиз 1776-тӥ арын Вятка губернилэн Нолинск уездысьтыз Курчум черкогуртын. Вяткаысь духовной академиез йылпумъяса (1800), отын ик математикалы, риторикалы, кылбуретлы, суредаськонлы дышетӥз. 1808-тӥ арын «Иж завод» каргуртлэн вань завод школаосызлы попечитель луиз, отын геометрилы но механикалы дышетӥз. 1812-тӥ арын Иж завод понна тылпу кысон машина малпаз. Александр Невскийлэсь соборзэ лэсьтонлы юрттӥз, солэн настоятелез вал. Библиез дышетонъя Огазеяськон радъяз, калыкез черке кыскон но югдытон вылысь Ижкарлэн палэназ поталляз. Одаос, кантъёс, озьы ик ӟуч, француз но латин кылъёсын мадьёс кылдытъяз, соосыз Мускоын но Вяткаын печатлаз. Соос вал тодос но оскон сярысь, озьы ик Александр I императорлы, Наполеонлэн кышкытлык кылдытэмезлы сӥземын. Кылдытӥз эмъюм турынъёсын бакча («аптекарский огород»). Дано югдытӥсьлэн, мерлыко ужасьлэн З.О. Лятушевичлэн юртаз ӵем гинэ кунояськизы Иж заводэз кылдытӥсь А.Ф. Дерябин, «Иж завод» каргуртлэн архитекторез С.Е. Дудин, ас кожаз дышетскем конструктор, «удмурт Левша» Л.Ф. Собакин но Иж заводысь мукетъёсыз тодмо адямиос.

«Лятушевич юртлэсь» ӝытшор фасадзэ висъяло котырес тусо мычиськем инты но мезонинлэн балконлы симметриё радъяськемез, кудӥз солэсь ӵапак шоролыко интыяськемзэ пусъе. Юртлэн уйшор но ӵукшор люкетъёсыз солэсь ӟуч классицизмлы тупась куинь люкето луэмзэ висъяло. Архитектуралэн валтӥсь тодметъёсыз: карнизъёслэн профилированной луэмзы, фриза, фронтона – юртъер-особняклы XIX даурысь ӟуч классика архитектуралэсь тусбуйзэ сёто. 1880-тӥ аръёсы шонер сэрего укноос арка тусо каремын вал. 1925-тӥ аръёсы, банклы шуыса, коркалэн уйшор но ӵукшор палаз нимысьтыз куинь укноё висъетъёс ӝутэмын вал. Озьы огъя юртлэн азьпал тусыз – фасадэз – симметризэ ыштӥз. XIX даурлэн интерьерысьтыз туннэ нуналозь кылемын ӧсъёслэн анфилада амалэн радъяськемзы, соос эркерной залэз артэ сылӥсь висъетъёсын герӟало, со сяна, утиськемын на мезонинэ нуись корт тубат.
1819-тӥ арын «Лятушевичлэсь юртсэ» казна басьтӥз, соин валче юрт «30-тӥ номеро казна корка» нимаськыны кутскиз. Огвакыт заводысь кузёослэн улонниоссы но татчы интыяськылӥзы, соин ик юртэз кыкетӥ «Генерал корка» но ниманы кутскылӥзы. Пӧртэм дыръёсы та юртэ интыяськылӥзы заводлэн эмъюмвузанниез (аптекаез), висисьёсыз пумитан инты. Революци бере юртэз Калык армилэн штабез аслыз кариз, собере – РСДРП (б)-лэн Ижкарысь огазеяськонэзлэн Комитетэз, озьы ик та вал Егит пролетарийлэн юртэз. 1920-тӥ аръёсы та юртъерын ужаз Кун банк, нош 1945–47-тӥ аръёсы «Лятушевичлэн юртаз» интыяськиз Элькунысь краеведческой музейлэн коллекциез, кудӥз 1939-тӥ аре Сарапулэ выжтэмын вал. Со сяна, татын вал Кузебай Герд нимо Йӧскалык музейлэн инкуазьлы сӥзем ёзэтэз, со туннэ но татын интыяське.

1995-тӥ арын «Лятушевичлэн юртэзлы» (историяя но архитектурая объектлы) «федерал пуштросъем историяя но лулчеберетъя синпелет» инэт сётэмын (РФ-ысь Президентлэн 20.02.1995 арысь 170 номеро косэтэз).

Страна:
Россия
Город:
Ижкар
Адрес:
Сивкова урам,180
09.07.2013
Информационно-аналитическоe управление Администрации города Ижевска © 1998-2017г.

При любом использовании материалов сайта ссылка на www.izh.ru обязательна
вход авторов,