Удмуртиысь Кун зоологической парк


Удмуртиысь Кун зоопаркез лэсьтон кутскиз 2007-тӥ арын тулыспалэ; Ижкарысь улӥсьёс но шоркарлэн куноосыз понна выль шутэтскон инты кылдытон борды басьтӥськизы ЗАО «Удмуртгражданпроект»-ын ужасьёс. Лэсьтӥськон ужъёсын кивалтӥзы Россиысь Спецстрое пырись 6-тӥ номеро УССТ-ысь ӧнерчиос.

Ижкарысь зоопарк радъямын калыккуспо куронъёсты лыдэ басьтыса, озьы ик санэ понэмын Европаысь тодмо ӧнерчилэн Богумил Краллэн дэмланъёсыз. Разработчикъёс азьын сылӥз шуг ужпум – лэсьтоно сыӵе аспӧртэмлыко архитектурной огъет, куке пӧйшуръёс усьтэм вольеръёсын улысалзы, мукет кылын вераса, инкуазьлы матын карем югдурын. Четлык интые кутӥсько гудэм нюкъёс, вуэн тырмытэм гопалъёс, электрокенеръёс, пияла. Одӥг ласянь, со юрттэ учкисьёслы пӧйшуръёсты каньылэн адӟыны; мукет ласянь, пӧйшуръёс асьсэзыз эрико шӧдо.

2008-тӥ арын куарусён толэзе Удмурт Элькунын пусйизы Удмуртилэсь ас мылкыд каремезъя Россие пыремезлы 450 ар тырмонэз. Шулдыръяськон ужрадъёс пӧлы пыриз Удмуртиысь Кун зоопаркез усьтон но.

Зоопарклэн экспозициосыз радъямын зоогеографи но ландшафт возетъёсъя, куке улосвыл висъямын луэ кӧня ке люкетъёслы, пӧйшуръёслэсь инкуазьын улон интызэс лыдэ басьтыса. Отын вань таӵе возьматонъёс:
– «Тӧдьы уйшор» – полярной уйсыос, тӧдьы гондыръёс, лымыӟичыос, зарезь котикъёс, моржъёс;
– «Кыдёкысь Ӵукшор» – амур тигръёс, ӵукшор леопардъёс;
– «Асьме палась сьӧдтэль» (тайга) – курень гондыръёс, кионъёс, балянъёс, сёръёс, лусьтыро сёръёс, харзаос, нӥзьёс;
– «Удмурт гурт» – пужо-животъёс;
– «Тымет» – койа карпъёс.

Та вакытэ Ижкарысь зоопаркын ог 300 пӧйшур улэ, соос 85 йӧслы висъясько. Куд-огез соос пӧлысь Россилэн Горд книгаяз пыртэмын, озьы ик Калыккуспо Горд книгае, мукет кылын вераса, соос кыр инкуазьын трос ик кылемын ӧвӧл ини. Зоопарк азьын таӵе ужмуг сылэ – со йӧсъёс мед утиськозы но тросгес луозы, нош со понна умой луонлыкъёс кылдытоно.
Ижкарысь зоопарк шоркарын улӥсьёс но куноос понна выль яратоно шутэтскон сэрег луиз, нош пӧйшуръёс но тылобурдоос понна – умой улон инты.

Страна:
Россия
Город:
Ижкар
Адрес:
Песочная урам
23.06.2014
Информационно-аналитическоe управление Администрации города Ижевска © 1998-2017г.

При любом использовании материалов сайта ссылка на www.izh.ru обязательна
вход авторов,