М. Горький ульчаысь купеч юртъёслэн огъетсы


М. Горький нимо урам – Ижкарысь тужгес но «улэп» магистраль. Революцилэсь азьло со Базарной шуыса нимаськиз, угось со борды базар итӥськиз, ӵапак татын Ижкарысь вузкаронлэн шорсюлмыз вал.

Горький урамысь 70-тӥ номеро кык этажъем из юртлэн кузёез пыӵал поттӥсь фабрикант В.И. Петров вал. Нырысетӥ этажаз С.Я. Чигвинцев купечлэн, Петровлэн ӵыжы-выжыезлэн, бакалей магазинэз интыяськиз. 1922-тӥ аре 3-тӥ гудырикошконэ Чигвинцевлэн азьвыл лавкаяз Коммунальной ульчаын (Горький нимо урам, 70) «Знание» нимо книгавузанни усьтӥськиз. Сое кылдытӥз «печатлам ужъёсты калык пӧлы вуттон но дунтэмгес дунын книга басьтыны луонлык сётон» сярысь сюлмаськись огазеяськон. Нырысетӥосыз книгаос, кудъёсыз вуизы магазинэ, ог 8000 экземпляр вал. Озьы Ижкарын книгаен вузкаронлы кутскон сётэмын вал. Со юртлэн ик вылӥ этажаз интыяськиз карлэн Шор библиотекаез, кудӥз кылдытэмын вал 1920-тӥ аре Нагорной волостной библиотека-читальнялэн инъетэз вылын. Берло со ёросъя библиотека луиз. Ӵапак отысь книгаос УР-ысь туала Йӧскалык библиотекалэн фондэзлы кутскон-инъет сёто.

Горький урамысь 72-тӥ номеро юрт лэсьтӥськиз В. Петров фабрикантлэн кулэ каремезъя, со кутӥськиз солэн пыӵал поттонъя паврикезлэсь дась продукцизэ возён вылысь. Революци бере юртын нимысьтыз ужоскетъёсъя комсомол батальонлэн штабез но арсеналэз интыяськизы. Бергес татын педтехникум вал, кудӥз собере педучилище луиз, нош 1931-тӥ аре – пединститут.
74-тӥ, 78-тӥ но 80-тӥ номеро юртъёс ХIХ даурлэн берпуметӥ куиньмосэзлы тупась провинциал архитектураез возьмато но Ижкарысь купеч лавкаослэн огъетазы пыро.

Горький нимо урамысь 76-тӥ номеро юртысь лавкаез 1911-тӥ аре Н.П. Тихонов купеч басьтӥз. Бӧрысьгес отын улӥзы нылпи эмчи С.Н. Тихонов но солэн пинь эмъясь кузпалыз А.Я. Тихонова, Самарин купечлэн нылыз, ачиз Самарин изьы вузанъя лавкалэн кузёез вал. Кузпалъёс 2-тӥ этажын улӥзы. Нырысетӥ этажез Ильматов агай-вынъёс промтовар магазинлы кертомазы (арендалы басьтӥзы). 1917-тӥ аре та коркаез кузёоосылэсь выль кунлы сётӥзы. 1920-тӥ аръёсы та коркалэн мурӝолаз бакча сиён будэтонъя «Заря» коммуна кидыслы дасям картофка возиз.

Горький нимо урамысь 84-тӥ, озьы ик 86-тӥ но 88-тӥ номеро юртъёс Оглобин купечлэн вал. Нырысетӥез склад карыса кутӥськиз, мукетъёсыз – лавка но вузаськонни луыса. Али дыре та юртъёсын интыясько вузаськон ужъюртъёс но огазеяськонъёс, нылпиослэн устолыкъя школазы но мукет.

Страна:
Россия
Город:
Ижкар
Адрес:
ул. Горького, 47, 49,74,76, 78, 80
09.07.2013
Информационно-аналитическоe управление Администрации города Ижевска © 1998-2017г.

При любом использовании материалов сайта ссылка на www.izh.ru обязательна
вход авторов,