БУК УР "Удмурт Элькунысь суредан устолыкъёсъя музей"


Суредан устолыкъёсъя музей Удмурт шаерлэн шоркараз 1980-тӥ аре кылдӥз. Со усьтэмын вал 1953-тӥ аре Ижкарысь архитекторлэн В.П. Орловлэн ӵектосэзъя партилэн райкомезлы ӝутэм юртын. Берлогес татчы пионеръёслэн Дворецсы интыяськиз.

Удмурт кунлыклэн 60 ар тырмонэзлы вуыны тыршыса, тупатъянэз-выльдонэз туж вакчи дыр ӵоже ортчытӥзы. Ӝыныё колоннаосын юртэз фронтонэн чебермазы, отысь кык музаос киязы музейлэн нимыныз картуш возё (скульпторез В.А. Цибульник), валтӥсь пыронлэн кык палысьтыз ик укноосы Г.А. Слюсарев но С.С. Медведев суредасьёслэсь витражъёссэс пуктӥзы. Интерьеръёсты выль сямен радъям бере музей ужаны кутскиз.
Элькунлэн шоркараз чеберлыкъя музей усьтон бордын суредасьёс но творческой визьужасьёс тыршизы: соос зол шӧдӥзы, промышленной карын уг тырмо адямилэсь мылкыдзэ но синзэ узырмытӥсь чеберлыко интыос.
Музей коллекцилэсь инъетсэ кылдытӥз 565 арбери, кудъёссэ Удмурт Элькунлэн шаертодонъя музеезлэн чеберлыко ёзэтысьтыз вайизы.
Та дыре музейлэсь валтӥсь фондзэ – со 11000 арберилэсь трос – Удмуртиысь суредасьёслэн но калыкысь усточиослэн, асьме шаерысь но Ӝытшор Европаысь усточиослэн ужъёссы кылдыто.
Тужгес но дуноосыз (музейлэн «инӟыосыз») пӧлы пыро XIX даурысь но XX даурлэн кутсконысьтыз ӟуч устолыклэн графикаен но буёло суредъёсын бичетъёсыз. Авторъёссы – З. Серебрякова, А. Бенуа, А. Васнецов, Е. Лансере, И. Шишкин. Озьы ик Удмурт шаерысь суредасьёслэн ужъёссы трос гинэ люкамын: А.П. Холмогоровлэн, П.С. Семёновлэн, С.Н. Виноградовлэн, Д.Н. Ходыревлэн, А.Е. Ложкинлэн, П.В. Ёлкинлэн, Б.А. Постниковлэн, Г.А. Репинлэн, М.Г. Гариповлэн. Вань Мускоысь, Санкт-Петербургысь но Россилэн мукет улосвылъёсысьтыз суредасьёслэн ужъёссы.
Музейын вань кӧня ке дыр ӵоже гинэ ужась адӟытонъёс, соос 3 толэзьлы одӥг пол вошъясько, со сяна «XVIII даурлэн пумысьтыз – XX даурлэн кутсконысьтыз ӟуч но Ӝытшор Европаысь устолык» нимо ялан ужась адӟытон-экспозиция.

Страна:
Россия
Город:
Ижкар
Адрес:
Кирова урам, 128
09.07.2013
Информационно-аналитическоe управление Администрации города Ижевска © 1998-2017г.

При любом использовании материалов сайта ссылка на www.izh.ru обязательна
вход авторов,