С.М. Киров нимо лулчеберет но шутэтскон Парк


С.М. Киров нимо лулчеберет но шутэтскон Парк – со историлэн но Ижкарысь садэз но паркез чеберматон-радъянъя устолыклэн синпелетэз. Планья малпам маке, со лэсьтэмын вал А.С. Коробов но Е.П. Беневоленский архитекторъёслэн ӵектоссыя.

Паркез лэсьтон 1933-тӥ аре куарусёнэ кутскиз. Рос-прос ортчытэм геодези эскеронъёс бере Иж тыметлы матысь интыын лысо тэль бордын ужъёс кутскизы: ужасьёс просекъёс коразы – сюбегесь, паськытэсь, дага выллемесь. Лӥялъёсыз бераллязы. Музъемез ӵошкатӥзы. Музъемлэсь выл сӥзэ басьтӥзы. Пумен просекъёс шонересь парк аллеяослы пӧрмизы.
1934-тӥ аре тулыс вуоно паркын пукон интыос, ӟусъёс лэсьтыны кутскизы, вузаськон сэрегъёс, эктон интыос кылдӥзы. Крезьгуро «куалемъёсысь» тодмо кырӟанъёс чузъяськизы. Сад бордын ужасьёс сяськаосын чебересь убоос лэсьтӥзы но турын кизизы, куакъёс но писпуос мерттӥзы. Вӧлмыт кушын тыметлы матэгес Вож театр усьтӥськиз, кема дыр ӵоже со Ижкарысь тужгес но бадӟымез сцена вал. Лулчеберет но шутэтскон парк сӥё-дано усьтӥськиз 1934-тӥ аре 6-тӥ гудырикошконэ. Со аре ик толсуре парклы С.М. Кировлэсь дано нимзэ сётӥзы.
Тылож аръёсы паркын ожчиослэсь туркымъёссэс люкаллязы но дышетылӥзы. Со сярысь мемориал доскаос но гудэм окопъёс верало. Пырон дорысь пужыё арка 1948-тӥ аре гинэ кылдӥз. Жаляса верано, аркалэсь вылӥ люкетсэ басьтоно луиз.
С.М. Киров нимо парк – Ижкарын улӥсьёслэн одӥгез яратоно парксы. Та тужгес умой инты кема дыр ӵоже юмшаны, велосипедэн но куасэн ветлыны. Гужем татын нылпиослы трос аттракционъёс ужало. Толалтэ – конькиен но куасэн нискылан, озьы ик тюбинген ворттылон сюресъёс-трассаос лэсьтэмын. Лысо тэль, чылкыт омыр, чуслык – ваньмыз та арлэн котькыӵе вакытаз умой шутэтскыны, дырез пайдаё ортчытыны луонлык кылдытэ.
Азьланяз паркез тупатъяны-выльдыны но умоятыны чакламын, нюлэс люкетсэ утьыса но Удмуртиысь Зоопаркен огазеяса. Озьы С.М. Киров нимо лулчеберет но шутэтскон Парк каньылгес но пайдаёгес луыны кулэ.

Страна:
Россия
Город:
Ижкар
Адрес:
Кирова урам, 8
23.06.2014
Информационно-аналитическоe управление Администрации города Ижевска © 1998-2017г.

При любом использовании материалов сайта ссылка на www.izh.ru обязательна
вход авторов,