Удмурт Элькунысь Йӧскалык библиотека


Удмурт Элькунысь Йӧскалык библиотекалэн ассюресэз юн герӟаськемын элькунмылэн но асьме кармылэн историеныз.

Усьтэмын 1918-тӥ аре 15-тӥ куартолэзе. Нырысь аръёсаз лыдӟонъюрт ас интызэ трос пол вошъяз. Тодмо, 1920-тӥ аре куартолэзе со Коммунальной урамын (али М. Горький) Н.И. Березинлэн, пыӵал павриклэн но чугун ӵыжатон заводлэн азьло кузёезлэн, юртаз интыяськылӥз шуыса. 1930-тӥ аръёслэн кутсконазы библиотека Советской урамысь 32-тӥ номеро юртлэн куинь висъетаз интыяськиз, огъя быдӟалаез 178,6 кв. м. вал. 1935-тӥ арысен 1957-тӥ арозь со – М. Горький урамын, 78 (али Устолыкъёсъя 1-тӥ номеро Нылпи школа).

1937-тӥ аре 23-тӥ толшоре, А.С. Пушкинлэн быремез дырысен 100 ар тырмемен валче, лыдӟетъюртлы быдӟым ӟуч кылбурчилэн нимыз сётэмын вал, кудзэ со 1958-тӥ арозь нуллӥз.
Кема дыр ӵоже татын ог 8 мурт гинэ тыршиз. Нырысетӥ ужасьёслэн ӧй вал удысужлыко дышетскемзы но библиотекаын ужан практиказы. Но 1920-тӥ аръёсысен кутскыса ини, егит ӧнерчиосты удысужлэн инъетэныз тодматӥзы.

Тылож ӝутскон вакытлы библиотекаын 14 ужасез вал ини (одӥгез – директор), соос пӧлын библиотекарьёс – 8 адями. Книгаос 55 сюрс мында вал.
1941–1945-тӥ аръёсысь Быдӟым тылож зол воштӥз библиотекалэсь ужзэ. Солэн валтӥсь ужез луиз – мобилизаци интыослы но эмъяськонниослы юрттон.

Ожгар ортчем бере библиотекалэсь ужзэ выльысь радъяно вал, солэсь материально-технической инъетсэ юнматоно луиз. Дас ар ӵоже (1945–1955) книгаослэн лыдзы кык поллэсь трослы будӥз (84 сюрсысен 184 сюрсозь).

Книгаослэн но лыдӟисьёслэн лыдзы будэмен библиотекалы выль юрт ӝутыны кулэ луиз. Солы ӵектос лэсьтыку, лыдэ басьтэмын вал Ставропольысь улосвыл лыдӟетъюртлэн проектэз (туэ Ставропольысь М.Ю. Лермонтов нимо кун улосвыло универсальной тодослыко библиотека), кудӥз пуктэмын 1955-тӥ аре (архитекторъёсыз Александр Эдуардович Лопатто но Анатолий Георгиевич Лысяков).

Та выллем юртъёс озьы ик лэсьтэмын Коми АССР-ысь Элькун библиотека (али Коми Элькунлэн Йӧскалык библиотекаез) но Орёлысь улосвыло библиотека понна (али Орёлысь И.А. Бунин нимо улосвыло тодослыко универсальной публичной библиотека). Удмурт АССР-ысь Элькун лыдӟетъюртлы проект лэсьтӥзы В. И. Антощук, Б. С. Чичкин, валтӥсь архитекторез – В. П. Орлов, валтӥсь конструкторез – Е. Гюллинг.
Удмурт АССР-ысь Элькун библиотекалэн 500 сюрс книгалы чаклам юртэз ӝутэмын 1957-тӥ аре; 1950-тӥ аръёсы со Ижкарысь одӥгез чеберез юрт луиз. Лыдӟисьёс понна библиотека усьтӥськиз 1958-тӥ аре 17-тӥ тулыспалэ.

1957-тӥ аре 27-тӥ шуркынмонэ Удмурт АССР-ысь Элькун библиотекалы В.И. Ленин ним сётэмын вал, нош 1958-тӥ аре 20-тӥ инвожое лыдӟетъюрт азьын синпелет усьтӥськиз.
1963-тӥ аре библиотекалы тодослыко статус сётэмын, нош 1989-тӥ аре – йӧскалык.
Туннэ нуналэ Йӧскалык библиотека тодослыкез но лул-чеберетэз азинтонын, Удмурт Элькунъя ивортодэт вӧлдонын но шаерын улӥсьёслэсь лул-сюлэм узырлыксэс утёнын бадӟым инты басьтэ.

Страна:
Россия
Город:
Ижкар
Адрес:
Советской урам, 11
09.07.2013
Информационно-аналитическоe управление Администрации города Ижевска © 1998-2017г.

При любом использовании материалов сайта ссылка на www.izh.ru обязательна
вход авторов,